【英超】史無前例4連霸!教曼城8年17個錦標 哥帥承認贏到冇目標 驚爆離隊時間表

史無前例4連霸、最強對手已離開……曼城領隊哥迪奧拿,於英超煞科日後拋出震撼彈,表示好大機會教埋下季,約滿即離隊!

英超又一季,曼城最終以2分壓倒阿仙奴,實現史無前例嘅英超4連霸。利物浦、維拉第3及4,下季參戰歐聯。熱刺作客3:0挫錫菲聯,保住第5位及歐霸入場券。車路士2:1挫般尼茅夫,季尾6連勝排第6,得以參加下季歐協聯,若果曼城喺足總盃擊敗曼聯,車仔甚至可以出戰歐霸,而第7嘅紐卡素就踢歐協聯。

唔止聯賽冠軍,曼城中鋒艾寧夏蘭特,亦以27球蟬聯神射手。正值歡欣時刻,哥迪奧拿捧盃後接受訪,驚爆自己好大機會教埋下季後就離隊。

除咗史無前例4連霸,今次亦係哥迪奧拿個人第6次捧英超冠軍,執教曼城8年,已經有包括歐聯在內嘅17個錦標,真正贏盡所有。佢承認已經冇明顯目標作為推動力,雖然表明下季仍會繼續領軍,但一再強調:「離完結更近」。

「上年贏歐聯決賽後,我同自己講已經冇嘢好爭,但係仲有合約……有時我覺得好攰,有時又好享受贏波。我開始諗,英超4連冠從未有人試過,點解唔試下?依家我任務完成,之後仲有乜未做?足總盃決賽,連尼加提醒我,未試過有人成功衞冕英超同足總盃『雙料冠軍』。」

哥迪奧拿同曼城只剩1年約,佢暗示下季季後好大機會離隊:「我離完結比留低更近,呢一刻我想留低,所以下季會繼續執教,但經過8、9年…我唔知下季仲有冇動力,因為贏晒所有冠軍,好難再搵新目標。」

哥迪奧拿嘅最強對手高普,喺煞科後已光榮告別利物浦,兩大名帥天王山對撼,已成英超重要歷史回憶。如果哥帥教完下季走埋,真正係一個時代終結,英超無疑會失色不少。