周六凌晨又有英超，車路士主場對盧頓，由今晚去到周二凌晨都有英超，拆散啲又可以睇多啲，正呀喂！好似呢場「貧富懸殊」之戰，其實好有睇頭，車仔如果贏唔到，就真係爆咯！
今場波有幾強弱懸殊？車路士球員身價高達9億5400萬鎊（約94億港元），同球員總值僅5200萬鎊（約5.1億港元）嘅盧頓，構成英超史上身價最懸殊戲碼。
車路士近期以破英超紀錄1億1600萬鎊，從白禮頓收購中場摩西斯卡些度，身價係盧頓今個夏天最貴收購、轉會費500萬鎊左閘基利斯嘅23倍。
今個夏天，車路士轉會市場用咗接近3億5000萬鎊，係盧頓1400萬鎊嘅25倍，數字上真係差天共地。但係咪多錢就一定可以贏波？開咧兩輪，車路士仲未開齋，首仗和利物浦仲合格，但上仗輸畀韋斯咸，令人極度失望。標王卡些度以後備身份首度上陣，完全冇態之外，更犯規輸12碼。
今晚回師史丹福橋主場，卡些度將首度正選上陣，呢位厄瓜多爾中場，誓要以表現為自己平反：「上仗效果並唔係我所預期咁，不過能夠代表車路士出戰英超，我都係覺得好開心嘅。嚟緊我會更努力練習，希望用表現協助車路士重返正軌，用勝仗嚟答謝球迷們嘅支持。」
卡些度上季場均錄得0.09次失誤，2.89次攔截同埋88.5%傳球成功率，係英超頂級防中嘅數據，經過上仗適應完之後，睇吓今仗可唔可以踢番應有水平啦！
