周六晚英超，近年最熱血一夜！連同早場利物浦反勝狼隊，周六晚英超共有7場賽事，當中有4場反勝，其中3場開出3:1，有兩場更加係補時階段奇蹟逆轉，激到爆！
賽前4戰全勝嘅曼城，今仗作客賽前不敗嘅韋斯咸，遇到極大考驗，36分鐘，今季光芒四射嘅中場禾特包斯，接應祖法傳中波頂入，韋斯咸爆冷領先。
曼城今場用新兵杜古掛帥，拍住菲爾科頓、夏蘭特攻堅，戰至42分鐘，杜古傳波去遠柱，夏蘭特無人看管下起腳，可惜畀對手護空門，曼城雖然喺上半場有超過6成控球權、多達17次攻門，但就係射極唔入，半場落後一球。
換邊後1分鐘，杜古終於嚟料，喺左路推入禁區再射遠柱，成功開齋。扳平後曼城氣勢如虹，艾華利斯中柱唔緊要，佢喺76分鐘助攻，傳過頭波入禁區，貝拿度施華挑射搞掂。完場前4分鐘，腳風唔順嘅夏蘭特終於入波，奠定3:1勝局，開季5戰全勝、15分排榜首。
另一支Big 7熱刺，今季換帥後好睇又好食，主場迎戰升班馬錫菲聯，以為會大炒一場，點知贏得勁辛苦。
今場熱刺繼續將李察利臣放後備席，由孫興民踢9號位，不過熱刺齋有凌厲攻勢，但點都射唔破表現神勇嘅錫菲聯門神科達寧咸，半場只能與錫菲聯踢成0:0。
熱刺喺下半場仍然控制戰局，但同樣射極唔入，反而喺73分鐘，畀錫菲聯咸馬轟入落後0:1。80分鐘，領隊普斯迪高古放手一搏，換走孫仔，換入李察利臣，呢位巴西前鋒終於爭番一口氣，先喺補時7分鐘頂入追平，再喺兩分鐘做助攻回後，古路錫斯基絕殺得手。熱刺奇蹟反勝後，聯賽5戰4勝1和、與利物浦同得13分。
黑馬阿士東維拉，亦創造奇蹟之役，佢哋喺主場反勝水晶宮3:1。水晶宮老帥鶴臣賽前因病未能領軍，一班戰將決心十足，希望以勝仗為主帥打氣，下半場由奧辛尼艾度亞迪建功領先，不過維拉打逆境波有料到，攻到完場前3分鐘，終於由杜倫追平，然後再喺補時8及11分鐘，由雷斯12碼及利安拜利入波，完成逆轉勝。
