曼聯幾經辛苦，終於喺英超以1比0擊敗升班馬盧頓，不過同時代價沉重，兩位丹麥國腳艾歷臣、海倫比賽期間受傷，暫時未知抖幾耐，而領隊坦哈格亦因為領黃，下場對愛華頓需要停賽。
曼聯今場控球指數超過6成，具威脅埋門亦唔少，不過加拿祖、海倫、以至拉舒福特嘅攻門，都逃唔過盧頓門將卡明斯基。曼聯今場expected goal去到2.74，但最終都係僅憑連迪路夫破網，以1比0小勝盧頓。
同時，英超今季對領隊投訴加強處罰，由原本累積4張黃牌就要停賽1場，改為累積3張就要停賽，坦哈格喺今場就因為投訴過激，累積3張黃牌，下場無法領軍作客愛華頓。
不過，最令坦哈格頭痛嘅，係中場艾歷臣踢咗40分鐘，就因為膝部受傷被換離場，而喺聯賽仲未開齋嘅前鋒海倫，亦戰至79分鐘傷出，初步觀察係腿筋受傷，兩位丹麥國腳暫時未知休息幾耐，但就肯定無緣出戰嚟緊嘅國際賽。
對曼聯嚟講，嚟緊兩星期國際賽反而嚟得合時，球會要等到11月27號凌晨先有比賽，喺英超作客愛華頓，除咗兩位丹麥國腳可以專心養傷，坦哈格亦可趁機調校吓鋒線，因為曼聯又要靠後衛入波，攻擊力差到得人驚。
「今日係美好嘅一日。我哋需要勝利，但今場波我哋可以取得第二球，令比賽更輕鬆。依家我哋冇殺死比賽，隨時就可被對手通過我哋嘅失誤，而扳成平手。」坦哈格賽後明顯唔滿意球隊嘅攻力。坦哈格亦話：「海倫喺歐聯攻入5球，佢信心應該冇問題，入球即將會到來。」
