【英超】又走晒樣!全場捱打被射31次 曼聯1:1和賓福特;坦克前4夢難圓:全隊都有責任!

畀你估到,就唔係曼聯喇!周日凌晨英超,曼聯全場捱打,即使96分鐘靠美臣蒙特射入加盟後首球先開紀錄,以為勝利在望,喺99分鐘依然被追平,最終作客1:1和賓福特,爭入前4機會再受打擊。

上場贏完利物浦入英足盃4強,領隊坦哈格即時上頭,話場波係曼聯今季轉捩點,開始強勢,最後除咗捧盃,排名更可追上前4,攞埋歐聯入場券,當時以為都似㗎啦,點知又被跣到直一直。

主場出擊嘅賓福特,全場佔盡優勢,多達26次射門,14次中目標。不過佢哋運氣真係麻麻,竟然共4次中柱,73分鐘,艾雲東尼入球又被判越位在先食詐糊。補時96分鐘,曼聯靠後備入替嘅美臣蒙特攻入加盟後第一球,意外領先。當大家以為世界真係咁唔公平時,99分鐘,基斯杜化艾查為賓福特追和1:1,攞返1分。

曼聯今仗全場落入下風,但補時階段仍意外領先,領隊坦哈格賽後話:「如果本身領先準備取勝,就唔應該畀勝利走甩。即使我哋踢得唔好,亦必須贏得比賽,我哋差啲做到,可惜賽果令我好失望……我哋唔值得贏波,全隊都應該企出嚟,承擔責任。」

曼聯執到1分,但第4名競爭對手維拉、熱刺都贏波,令紅魔更難得到下季歐聯入場券。維拉贏狼隊2:0,30戰59分排第4;熱刺憑孫興民86分鐘入波,2:1反勝盧頓,29戰56分,同維拉叮噹馬頭。

曼聯排第6,29戰48分,雖然打少場,但比維拉少11分。聯賽剩9場,就算贏晒都未必可以反先,更何況,曼聯同坦哈格真係做到全勝?