【英超】又被追和 利物浦2:2韋斯咸 爭標凍過水;沙拿同高普嘈交 仲有冇勝仗送別舊帥?

利物浦上輪英超作客0:2輸畀同市宿敵愛華頓,球員踢到無精打采,周六作客鬥韋斯咸諗住反彈,最後都被槌仔幫安東尼奧入波逼和2:2,完全回復以前海鮮波本色。聯賽爭標已幾近無望,最弊沙拿後備登場嗰陣仲同高普口角……問題浮現,季尾3場,紅軍可以贏到幾場送別高普?

今場作客鬥韋斯咸,高普大玩輪換,踢到無火嘅沙拿、紐尼斯後備,加普、艾利洛搭路爾斯戴亞斯踢三叉戟攻堅,韋斯咸則繼續由柏基達同查洛保雲領導球隊。

紅軍上半場大部份時間控球在腳,但傳中入禁區都過唔到韋斯咸一班守將。40分鐘,戴亞斯左路推入禁區地波射中柱,未能先開紀錄。紅軍唔入,轉頭就到韋斯咸嚟料,查洛保雲禁區快射被艾利臣比加撲出底線,但跟手角球攻勢,保雲就接應隊友傳中頂個彈地波搞掂,主隊43分鐘領先1:0完半場。

高普急急腳走返入更衣室,唔知係咪省過班球員,隊波下半場出來係唔同咗。48分鐘,羅拔臣接應戴亞斯傳中,左腳勁抽入網追平1:1。65分鐘,加普攻門,逼到韋斯咸蘇捷擺烏龍,由落後變反先2:1。不過韋斯咸命不該絕,77分鐘保雲傳中,安東尼奧升起頂入追平2:2。

高普隨即換入沙拿、紐尼斯,再用祖高美斯換走阿歷山大阿諾特,不過一輪改變都係無效之餘,仲被鏡頭影到沙拿同高普嘈交,最終2:2失分收場。

踢埋呢場之後,利物浦35場得75分,守住第3。第1位係34戰77分嘅阿仙奴,第2位係33戰76分嘅曼城。阿仙奴聽晚9點作客鬥熱刺,曼城聽晚11點半作客諾定咸森林,但紅軍今輪又失分,想兩支對手一齊失分等埋你?難啲咯!

利物浦想爭標,但近期連環自爆後,相信都無咩機會。不過仲有3場,相信班兵都想盡量贏波送別高普。最後3輪分別係主場對熱刺、作客阿士東維拉,仲有主場對狼隊。呢場對狼隊嘅謝幕戰,就係高普執教9年嘅終點。全世界利迷都撲緊飛睇呢場波,希望好好享受高普喺晏菲路嘅最後一夜。