尋日大年初一，艾寧夏蘭特旺氣返晒嚟，又再連中三元，曼城主場3:0大勝狼隊，球迷對超級射手嘅憂慮，可謂一掃而空。
其實對狼隊一戰，唔係話超多波交到畀夏蘭特腳下，但只要有一個出色傳送，佢就有本事轉化為入球。40分鐘，奇雲迪布尼右路高波傳中，夏蘭特躍起頭槌攻門，高度力度皆備，唔單止撞散對手後衞，亦將個波頂入狼隊大門，曼城上半場領先1:0。
根度簡50分鐘搏到12碼，夏蘭特操刀射成2:0；到54分鐘，狼隊門將傳波失誤，畀馬列斯搶到波，手套球王雖然腳風順到爆，仍然無私交橫，畀夏蘭特左腳推射破網，上演帽子戲法。
夏蘭特今季首度參戰英超，已經4次戴帽，超過C朗英超生涯總和（3次）。20仗25球，更令佢只踢咗半季，入球數已超越近3季金靴獎得主。占美華迪（19-20）、哈利卡尼（20-21）、沙拿及孫興民（21-22）。
英超歷史紀錄係34球，分別由紐卡素中鋒舒利亞、曼聯射手高爾締造。夏蘭特仲有18場可以追，如果冇傷冇病，應該可以刷新紀錄。雖然只有22歲，但今仗已經係夏蘭特職業生涯第16次戴帽，著名足球數據網站Squawka都拜服，賽後問句Why Always 3？
前曼城射手、陪住球會高低起跌嘅迪哥夫，都忍唔住話：「4次帽子戲法，我踢咗20年職業波先做到，佢就用咗20場！」
