車仔又甩轆，1:1賽和護級份子諾定咸森林，距離第4嘅曼聯已經有7分之多，歐聯資格危危乎，好在班主保利有嘅係熱誠同埋錢，今月轉會窗重開，已經準備好大展拳腳，至少買5件搏一鋪！
賽前車路士已經有兩單好消息，轉會專家Romano報導，摩納哥中堅巴迪亞舒利已落實上車，轉會費為3800萬鎊，只差體測就完成手續。
而另一單已落實嘅交易，係華斯高18歲中場新人王安德烈山度士，據Romano所講，轉會費大約為1200萬鎊，而名宿祖連奴比南布肯奴，更大讚呢位超新星可以喺英超立足，係即食戰力。
加埋早前已經搞掂嘅科特迪瓦前鋒大衛科芬拿，嚟到1月2號，車路士已經買咗3人，相當瘋狂，但今場踢落，完全冇受好消息刺激，表現依然咁曳。
車路士今場繼續用夏維斯做假9，普列錫、美臣蒙特同史達寧做支援，中場兩位悍將薩卡利亞、佐真奴，喺16分鐘有個好開始，史達寧執入中楣波先開紀錄。
但森林換邊後發力，㩒住車仔狂砌，63分鐘，終於憑右閘奧里亞助攻得手，喺混戰中窩利抽入，最終1:1平手，各得1分。
車路士近7場聯賽6次失分，依家喺積分榜16戰25分，只排第8位，落後第4位嘅曼聯7分，歐聯資格極為凶險。
車仔最大問題係創造力同攻力不足，班主保利已承諾瘋狂科水，除咗上文提到嘅3位已落實交易，阿根廷中場安素費南迪斯、馬體會前鋒祖奧菲歷斯如無意外的話，亦有望來投，即管睇吓今個冬窗，車路士能否大翻身啦！
