【英超】又咁抿水!紐尼斯補時9分鐘絕殺 利物浦險勝森林;高普:我哋終於捱完喇!

又係咁抆水,搞到擁躉嚇餐懵!利物浦周六晚英超作客森林,補時9分鐘先至由後備達雲紐尼斯頭槌絕殺,險勝1:0,保住榜首優勢。

榜首3雄形勢,利物浦贏波後,27戰63分;曼城26戰59分,周日晩同曼聯進行打吡戰;阿仙奴26戰58分,周二凌晨對錫菲聯。至於維拉頂住第4,27戰55分,作客盧頓曾領先兩粒,雖然一度被追和,但盧卡斯迪尼89分鐘入波,贏3:2。

熱剌26戰50分排第5,主場對水晶宮亦落後在先,直至77分鐘,由迪姆華拿、基斯甸羅美路、孫仔11分鐘內連入3球,以3:1反勝。

但講驚險同戲劇性,利物浦永遠係冧把溫。上周日「高普童子軍」喺聯賽盃決賽大放光芒,史詩式贏得冠軍;周中英足盃16強同樣殘陣下擊敗修咸頓,今仗回歸聯賽,傷兵情況稍有好轉,起碼遠藤航、蘇保斯拉爾、達雲紐尼斯都可以先做後備。

紅軍踢落依然辛苦,有優勢而欠具直接威脅埋門,上半場仲幾乎被森林前鋒艾蘭加單刀搞掂,又係靠門將基利靴力挽狂瀾,用腳擋出必入波。

高普60分鐘開始㩒掣,換入達雲紐尼斯、蘇保斯拉爾等主力,但一直搵唔到入波,以為紅軍終於要失分,補時9分鐘,麥卡里士打傳中,搵到達雲紐尼斯,畀佢一個頭槌搞掂,利物浦贏1:0後聯賽4連勝。

高普賽後亦大讚一班子弟兵:「11日4場比賽,15日5場,以我哋目前嘅陣容嚟睇,真係好困難。不過,我哋捱過咗,球員們做得好好。我哋必須戰鬥到底,即使今場最終比分係0:0,亦無法改變球員努力嘅事實……如果12日前你問我,我哋可唔可以贏晒4場,我會話根本冇可能,但係佢哋做到了。」