'

【英超】又刧富濟貧!利物浦0:1負包尾森林 舊將艾禾尼爾一腳射死紅軍 真正吐氣揚眉

贏完曼城,以為一切向好?畀你估到嘅就唔係利物浦啦!周六英超早場,利物浦作客0:1不敵包尾大幡諾定咸森林,球員冇厘神氣,睇落攰到飛起,又再打回原型。

傷兵已經多,後備力量唔夠,仲要留力歐聯,就係利物浦面對嘅困境。今場個陣又真係幾殘,本身已有迪亞高祖達、路爾斯戴亞斯長抖,達雲紐尼斯、艾簡達拿亦因輕傷及耳疾唔出得。

兩個年輕中場,哈維艾利洛、居迪斯鍾斯出齊,拍法賓奴做正選,另一後生仔法比奧卡華路,同沙拿、法明奴打前鋒,可惜3人表現都係平平無奇,對球隊冇乜大貢獻。

利物浦上半場只能同森林拉成均勢,較有威脅係卡華路半單刀,被甸恩軒達臣封出;仲有雲迪積克助攻,佢本身已經無人看管,但唔直接頭槌攻門,反而頂番入中路,又冇隊友接應,令人睇到搲晒頭。

森林攻勢本來唔多,一味靠快靠衝,但55分鐘多謝祖高美斯又再甩漏,森林得到一個自由球機會,中鋒艾禾尼爾接應傳中,快射先中柱,但佢反應夠快補射入網。

艾禾尼爾只有24歲,呢位尼日利亞前鋒喺2015年加盟利物浦,但從未為紅軍上陣,因工作證問題被長期外借,6年轉換6間球會,過住浪人生活,上季終於被柏林聯買斷,今個暑假以破森林紀錄1750萬鎊加盟,去到第12輪一腳射死前球會,真正爭番口氣。

原本諗住輪換,畀部分主力休息,留力周中歐聯作客阿積士,但對住森林都落後,高普無奈換入阿歷山大阿諾特、佐敦軒達臣,希望扭轉敗局。

但面對對手死守,利物浦既冇速度,又欠創造力,反而森林突擊更有威脅,如非艾利臣比加屢救險球,紅軍早已唔止輸一粒。

補時階段,出現黃金扳平機會,雲迪積克又有近門頭槌攻門,眼看必入,又畀迪恩軒達臣神奇撲出,註定利物浦今季又出現一場敗仗。

森林士氣高昂,完全值得收穫升班後第2場勝仗,加上今場仲要係贏Big 6勁旅,球員同球迷賽後興奮萬分,慶祝久違了嘅頂級聯賽勝利榮光。其中最激動,當然係利物浦棄將艾禾尼爾。