又認錯！英國職業裁判員公司(PGMOL)發聲明，為熱刺主場迎戰利物浦一戰中出錯而道歉。但高普話齋，都拎唔番啲分，下次又繼續犯錯，道歉有咩用？
周日凌晨上演本周英超大戰，賽前均未嘗一敗嘅熱刺同利物浦交鋒，呢場波出現多次爭議性判決，利記最終喺9人應戰之下，力抗至補時失波、慘輸1比2。
熱刺主場出擊份外進取，出齊晒4位進攻球員占士麥迪臣、孫興慜、古路錫斯基同李察利臣，至於利物浦三叉戟係沙拿、加普同路爾斯迪亞斯，祖達同紐尼斯先列後備。
兩軍鬥得相當激烈，但26分鐘，今場波嘅第一個關鍵點出現，利物浦中場居迪斯鍾斯鏟波踩中比蘇馬，球證原本出示黃牌，但VAR介入，球證改判直接紅牌，罰鍾斯離場。
34分鐘，踢少個嘅利物浦都係咁銳，路易斯迪亞斯更突破越位先開紀錄，不過旁證舉旗示意越位，但睇番慢鏡其實係疑似冇越位，而VAR竟然喺冇畫線嘅情況就咁算數，比賽繼續。大難不死嘅熱刺，1分鐘後即靠一次美妙組織，由孫興慜先開紀錄。
利物浦踢少個兼落後仍無放棄，上半場補時4分鐘，蘇保斯拉爾傳去遠柱，雲迪積克二傳，加普控定後勁射破門，半場踢成1:1。
不過，踢到68分鐘，戰情又起變化，祖達1分鐘內連拎2張黃牌被趕出場，利物浦得番9人應戰，力守到最後補時6分鐘，樸羅傳中，麥迪比解圍擺烏龍，最終以1比2落敗。熱刺賽後以5勝2和17分升上第二，僅落後同晚輸波嘅榜首曼城1分。而利物浦以5勝1和1負16分排第4。
VAR又出事，PGMOL賽後即刻出聲明：「上半場出現重大錯誤，球證團隊判迪亞斯越位係錯，但VAR又冇介入…PGMOL會檢討呢次失誤，並會總結呢次教訓，同利物浦聯絡。」早喺上年2月，阿仙奴主場對賓福特，VAR都試過唔記得畫線令阿仙奴失分，涉事球證李美臣事後提早退休。
利物浦領隊高普賽後嬲到爆：「道歉幫到邊個？之前曼聯對狼隊都發生過啦，咁狼隊拎番啲分未？我哋唔會因為佢哋呢個道歉而拎到分。我從來未遇過咁唔公平同判決咁痴線嘅比賽，我好難受，但我為球員表現感到自豪！」
高普再講落去，認為兩張紅牌都有爭議：「第一張紅牌，慢動作睇番，居迪斯鍾斯係全速踩落個波度，而迪奧高祖達第一張黃牌根本就唔應該畀，然後佢拎到第二張而被逐。」
