【英超】又入兩球!前鋒唔掂檔 好在有麥湯!曼聯2:1拆車 安拉拔超搶鏡:坦克世一

曼聯前鋒唔爭氣,好在仲有麥湯米尼!周四凌晨英超快車,呢位蘇格蘭中場梅開二度,助紅魔主場2:1險勝車路士,成功反彈,坦哈格終於棄用拉舒福特,可能係致勝關鍵,賽後中場猛將安拉拔,亦大讚坦克係世界最佳教練之一。

曼聯今場將作戰態度九流嘅拉舒福特貶為後備,由海倫、安東尼、加拿祖、般奴費蘭迪斯組成鋒線,活力返晒嚟。至於車路士以尼高拉積遜掛帥,梅迪歷、高爾彭馬、史達寧支援,同樣睇頭十足。

開賽9分鐘,曼聯就有領先機會,安東尼喺禁區內被安素費蘭迪斯掃跌,球證判罰12碼,不過般奴射中間,被山齊士輕鬆撲走。錯失機會唔緊要,曼聯始終係形勢佔優一方,19分鐘,麥佳亞起腳被擋,麥湯文尼補中,領先1:0。車路士喺完半場前由彭馬推射建功,追平1:1完半場。

換邊後戰至69分鐘,加拿祖傳中,麥湯一錘定音,曼聯再度領先。之後車仔積極反撲,完場前波也勁頂被奧拿拿救出,最終紅魔力保勝局,15戰27分排第6,車仔15戰19分排第10。

梅開二度嘅麥湯賽後話:「我享受後上入禁區嘅感覺,當機會嚟到嗰陣,若果我把握得好啲,就可以連中三元了。」佢今季喺英超已入5球,突破個人喺球會嘅單季新高,有入波嗰3場比賽,紅魔悉數獲勝。

除咗麥湯,佢嘅中場拍檔安拉拔,今場亦超搶鏡,完全將車路士中場線全面壓制,安拉拔今場有11次奪回控球權,3次攔截全部成功,相當誇張。安拉拔賽後受訪,亦好識做大讚坦哈格:「我上次跟佢已經係7年前,佢當時已經係一位好出色嘅教練,到咗依家,佢直情係世界最佳之一,我哋都好支持同尊重佢。」