邊個會係下一個落鑊英超領隊，謝拉特係首席熱門，依家可能要讓位畀羅渣士。周五凌晨快車壓軸戰，李斯特城主場0:1不敵曼聯，開季1和4負，繼續包尾。
對曼聯之前，科芬拿確定轉會車路士，轉會費7000萬鎊，另加500萬鎊特別條款。科芬拿被視為英超最佳年輕後衛之一，李斯特城未能抗拒超高轉會費，選擇犧牲球隊實力，令羅渣士面對更艱困處境。
曼聯領隊坦哈格，亦曾經四面楚歌，但連埋今仗，踢出3連勝走勢，壓力一掃而空。嚟緊周日，曼聯會主場對5戰全勝嘅阿仙奴，身價高達1億歐元、由阿積士轉會翼鋒安東尼，有機會首披紅魔戰衣，呢場大戰點可以唔睇！
踢得咁順，坦哈格當然唔變陣，C朗、馬古尼繼續做後備，卡斯米路都係，領隊話唔駛急，超級防中未係時間做正選，擺明留力打阿仙奴。
曼城今場睇住食，對住李城疲弱攻力，華拉尼、利辛度馬天尼斯頂得住有餘，防線係穩陣咗嘅；打突擊就啱晒幾隻快馬，23分鐘乘李城掛住谷上，防線空虛，查頓辛祖單刀射成1:0。
李城下半場殊死反撲，壓住曼聯嚟砌，卡斯米路係時候上陣，穩住中後場。一味死守亦唔係辦法，換埋C朗入嚟加強番攻力。C朗出場後好落力，幾次為隊友製造機會，一個凌空半倒掛僅僅斜出。
同上仗對修咸頓一樣，曼聯再以1:0小勝，表現同樣唔突出，但平平穩穩，主要贏在平均質素，周日面對大勇嘅阿仙奴，一定要打番對利物浦時嘅高水準先有價講，如果只交番近兩仗水準，都真係唔太樂觀。
