今晚英超頭場賽事，熱刺主戰狼隊，雖然熱刺整體嚟講唔算佔太大優勢，但憑住出色戰術配合同個人質素，由卡尼頭槌建功，以1比0小勝狼隊，開季3場波2勝1和。
熱刺3421陣式，由國米來投嘅新兵比列錫擔正踢翼衛，不過整個上半場，熱刺埋門少之又少，係臨完半場前先得1次中龍攻門，反而積極擴軍嘅狼隊入肉更多，一條葡萄牙中場線攻守俱備，新兵馬菲奧斯紐尼斯拍住摩天奴、魯賓尼維斯，踢落幾有台型，有球迎頂僅僅斜出，差啲地標戰即開紀錄。
換邊後，熱刺明顯嚟料，卡尼有球攝位飛頂中楣，已經為狼隊響起警號，之後孫興民雖然失機，好彩去到63分鐘，熱刺一個靚絕角球攻勢，比列錫二傳，卡尼不負所託迎頂建功，呢球亦係佢為熱刺攻入嘅第185個聯賽入球，打破阿古路為單一球隊（曼城）嘅入球最多紀錄。
最終熱刺順利全取3分，繼上場逼和車路士後，再一次成功利用角球攻勢搵食，3戰2勝1和積7分，暫時過吓一哥癮。
