周六晚英超，艾寧夏蘭特稍為低調，只入1球，曼城主場仍以4:0擊敗修咸頓，23分暫升上榜首。阿仙奴少踢1場少兩分，周日晚主場大戰利物浦，睇吓可唔可以搶番榜首位置。
面對聖人，曼城贏得極輕鬆，上半場祖奧簡些路、菲爾科頓入波；下半場馬列斯射成3:0；跟住點少得佢，艾寧夏蘭特65分鐘，射入個人今季英超第15球，各項賽事第20球，而球季開始，只係剛滿兩個月。
夏蘭特連續7場英超入波，距離紀錄仲差4場，2015-16球季，占美華迪為李斯特城連續取得士哥。
奇雲迪布尼亦繼續做助攻王，菲爾科頓入球，正係由佢美妙助攻。計埋呢球，迪布尼有95次助攻，殺入英超史上第5位，之前有傑斯（162）、法比加斯（111）、朗尼（103）、林柏特（102）。
車路士主場3:0挫狼隊，升上第4位，樸達上任後3勝1和，保持不敗金身，延續新帥效應。
歐聯送AC米蘭三蛋後，車路士作多個位置變動，收起列斯占士、史達寧、奧巴美揚，用夏維斯、基斯甸普列錫打前鋒。狼隊方面，前車路士冠軍中鋒迪亞高哥斯達，出任正選中鋒，倒戈相向，但歲月不饒人，加上隊友欠供應及配合，未有對前球會構成大威脅。
面對狼隊，車路士上半場自然控制戰局，但欠缺上述三人，攻勢嫌慢同迂迴，直至完半場一刻，夏維斯頭槌建功，打開紀錄。
狼隊戰績差劣，入唔到波係死症，打埋今場，9仗只有可憐嘅3球，今仗下半場反攻乏力，防線露出更多空位，再畀基斯甸普列錫、保查攻破大門，輸0:3完場，繼續以6分排倒數第3。
