又係呢兩個男人！周六英超，曼城開波26分鐘已打少個，最後仍可以喺主場2:1挫富咸，因為迪布尼博到12碼，而艾寧夏蘭特後備登場、補時5分鐘射入，驚險全取3分。
歐聯對多蒙特一戰受傷，令艾寧夏蘭特缺席對李斯特城、西維爾兩場賽事，今仗亦先做後備，曼城同時收起埋另一主力鋒菲爾科頓，用祖利安艾華利斯做中鋒，拍基亞利殊同貝拿度施華。
16分鐘，「新阿古路」祖利安艾華利斯已先開紀錄，但26分鐘形勢突變，祖奧簡些路魯莽食全餐，曼城除咗輸12碼被追和1:1，更要早早打少個。
曼城整體實力佔優，打少個當然冇陷入劣勢，哥迪奧拿唔滿足主場和波，下半場9分鐘㩒制，換入艾寧夏蘭特、菲爾科頓，調走艾華利斯、基亞利殊，用番最強鋒線搶3分。
夏神即係夏神，佢出場後直接攻門嘅威脅力，即時全面上升，特別同奇雲迪布尼精妙配合，令富咸防線風聲鶴唳。
77分鐘，艾寧夏蘭特曾頭槌破網，但可惜越位在先；到補時4分鐘，迪布尼護住個波，進可組織攻勢，亦可博富咸球員出腳，結果安頓羅賓遜真係中計，被判罰12碼，夏神冇甩拖，操刀射成2:1，令曼城暫上榜首，領先少踢1場阿仙奴1分。
12場英超入18球，艾寧夏蘭特英超入球數，已追平佢爸爸用咗181超英超，先至達到嘅士哥數目。老夏蘭特賽後轉發相關數據並留言：「只係時間問題。」
同時，要留意係曼城13場英超入39球，夏蘭特佔接近一半，而迪布尼則入3球、9次助攻，可見二人嘅重要性，曼城想爭創歷史，難怪要搵專人貼身跟進佢哋嘅健康情況啦！
