被狂炳之後，哥迪奧拿終於肯換人，仲換足5個添！曼城周六晚作客以4比1大破般尼茅夫，艾寧夏蘭特有波入，加冕球會單季射手王。
上仗無端端被弱隊森林迫和，曼城今仗更加不容有失，全取3分之後，25戰55分仍守次席；同晚榜首阿仙奴作客1比0小勝李斯特城，24戰57分。
周中歐聯對RB萊比錫，曼城領隊哥迪奧拿不動如山，全場冇換過一個人，特別係菲爾科頓、祖利安艾華利斯等可以Hold波、改變戰局嘅球員齋坐，令球隊保唔住領先優勢，最終被迫和，哥帥亦因此備受抨擊。
今次作客般尼茅夫，菲爾科頓、祖利安艾華利斯猛虎出柙，上半場菲爾科頓入1球加2助攻，艾寧夏蘭特、祖利安艾華利斯亦分別建功，曼城上半場已領先3比0。下半場哥迪奥拿用晒5個換人名額，大局已定下亦冇增加壓力，只藉對手擺烏龍入多球，作客大勝4比1。
進入2023年後，艾寧夏蘭特入球效率大降，今仗終於再有波入，今季英超已射入27球，打破阿古路紀錄，成為曼城英超單季射手王，由於仲有13輪聯賽，挪威神鋒將不斷刷新紀錄。
較早時間上演嘅阿仙奴作客李城，食咗兩舖詐胡，最終仍藉加比爾馬天尼利，下半場開波1分鐘閃電入波，小勝1比0，繼續坐喺榜首位置。
