【英超】即將落實!支出上限新例 16隊贊成 曼城曼聯反對都冇用;紅魔隨即放風換血 只留3人

尋晚英超冇比賽,但一樣成為球壇焦點,支出上限條例會議,尋日已獲初步通過,20支英超代表中,有16隊贊成、3隊反對、1隊棄權,投反對票嘅分別係曼聯、曼城及阿士東維拉,車路士則棄權。

《天空新聞》、《泰晤士報》等多家英國媒報導,尋晚英超會議,原則上同意設定支出上限。支出上限將建基於英超榜末球隊嘅電視轉播費用,以上季為例,英超包艇嘅修咸頓電視轉播費為1.04億鎊,另外19隊嘅支出上限係該轉播費嘅5至6倍(幾多倍未有定案),以6倍計,英超每隊嘅總支出上限,就係6.24億鎊。

之前英超已經同意引入85%工資帽,亦即英超20隊,最多只可以將該季收入嘅85%,用喺轉會、人工及經理人俑金,呢兩項規則,亦將會全面取代現行嘅利潤及可持續發展規則(PSR)。兩條條例會喺6月份嘅股東大會進行最終投票,只要14隊贊成,條例就會通過,一旦通過,2025/26賽季開始正式生效。

曼聯球員嘅人工係全英超最貴,但成績不成正比,新條例實行在即,英國《電訊報》指,曼聯今夏會嚟一個砍掉重練嘅「換血」行動,除咗3位年輕人明奈、加拿祖同海倫,其餘全部掛牌,包括隊長般奴、青訓產品拉舒福特,今季先加盟嘅門將奧拿拿等,啱價即放。

至於據sportbible.com指,目前英超20隊嘅稅前周薪如下:

  1. 曼聯:382.1萬英鎊
  2. 曼城:370.5萬英鎊
  3. 阿仙奴:329.8萬英鎊
  4. 車路士:297.8萬英鎊
  5. 利物浦:267萬英鎊
  6. 阿士東維拉:213.5萬英鎊
  7. 熱刺:213萬英鎊
  8. 韋斯咸:183.3萬英鎊
  9. 紐卡素:163.8萬英鎊
  10. 愛華頓:152.4萬英鎊
  11. 水晶宮:140.8萬英鎊
  12. 富咸:128.8萬英鎊
  13. 諾定咸森林:128.3萬英鎊
  14. 白禮頓:116.5萬英鎊
  15. 般尼茅夫:97.3萬英鎊
  16. 賓福特:83.6萬英鎊
  17. 狼隊:83萬英鎊
  18. 般尼:70.7萬英鎊
  19. 錫菲聯:67.4萬英鎊
  20. 盧頓:46.9萬英鎊