曼聯2連勝！周六英超早場作客1:0挫修咸頓，表現冇「雙紅會」咁醒神，但勝在穩陣，唔駛出卡斯米路正選，中後場仍然頂得兩嘴。坦哈格效率行先，C朗想多啲出場時間，要好似今場咁，等吓喇！
上場贏利物浦咁叻仔，梗係唔亂變陣，曼聯繼續收起C朗、麥佳亞，卡斯米路亦先做後備，前鋒用番拉舒福特打單箭頭，辛祖、般奴、艾蘭加後上支援。
修咸頓開季勝和負各一，總算硬淨，上半場亦同曼聯打成均勢，逼得夠緊，令曼聯冇咁順暢。計整個上半場，只有一個真正危險攻門，辛祖、艾歷臣近門連環炮轟，都畀修咸頓血肉長城擋出，力保不失。
無可否認，曼聯進攻隊型係好咗，下半場10分鐘，取得全場唯一入球，亦係右路一個良好配合，達洛治助攻傳中，般奴楔入禁區射成1:0。
修咸頓全力反攻，曾迫到迪基亞救出一個極危險頭槌。曼聯尾段全軍縮後，密集死守，後備席咁多猛人亦冇浪費，先後換入C朗、卡斯米路鎮住局面，C朗除策動突擊，亦非常落力返後防守，對住唔鋭利嘅聖人鋒線，保住1:0勝果完場。
曼聯下仗作客李斯特城，安排周五凌晨舉行，係周中快車壓軸戲碼。但對紅魔躉嚟講，會更關心夏季轉會窗9月1日關閉前，C朗究竟轉唔轉會？同埋係咪會用1億歐元收購阿積士翼鋒安東尼？答案好快揭曉。
