曼聯主場擊敗利物浦，暫時可鬆一口氣，卡斯米路下仗出戰，表現或可更上一層樓，唔少曼迷甚至希望呢位世界級防中，會成為另一位堅尼。
可唔可以好似當年堅尼咁，成為紅魔鐵血領袖？目前言之尚早，但卡斯米路好尊重呢位曼聯傳奇隊長，禮數做到足。
對利物浦賽前，卡斯米路步入奧脫福球場，同球迷行見面禮。當行返看台，見到正在場邊做緊電視評述工作嘅堅尼時，卡斯米路主動走過去，好有禮貌地同名宿握手、寒暄同擁抱，對前隊長顯示敬意。好多曼聯迷都話，呢個場面好鬼正，有啲似交接禮咁，有種激動感覺。
堅尼對卡斯米路，亦給予高度評價：「希望一如預期，佢會成為曼聯新傳奇。卡斯米路經驗豐富，我哋多年以嚟都冇出色嘅防中，佢有足夠質素成為天選之人。」
卡斯米路登陸奧脫福，唔單止令曼迷、名宿激動，就連之前屢次「傳曼聯」嘅法蘭基迪莊都有feel，卡斯米路被貼一張進入奧脫福嘅相，有球迷留意到迪莊喺IG畀咗個like，荷蘭小將馬拉斯亞喺雙紅會賽後出po講曼聯，迪莊亦有派like，唔通佢真係態度軟化有彎轉？
轉會窗即將關閉，巴塞目前仲未幫新守將觀迪註冊，而且巴塞目前同曼城貝拿度施華「眉來眼去」，只要賣走法蘭基迪莊，所有問題就可以全部解決，包括迪莊嗰1400萬鎊欠薪。
卡斯米路+迪莊任雙防中，般奴或艾歷臣派牌，強攻時卡米防中，迪莊擔任中堅幫手分波，般奴同艾歷臣雙核，諗落又真係幾正嘅。
