又紅！卡斯米路因一次攔截被逐，曼聯大部分時間打少個，周日主場0:0賽和修咸頓，連續兩場聯賽失分，進一步被阿仙奴、曼城拋甩，歐霸盃、足總盃成為曼聯餘下賽季主要目標。
繼上周吞利物浦7蛋後，曼聯再度失分，雖然仍排第3位，但已落後榜首阿仙奴16分，距離曼城亦有11分差距，想爭英超已經冇乜可能，保住前4，再向盃賽進發先最實際。
歷史性慘負利物浦後，曼聯瞬速反彈，周中歐霸盃大炒貝迪斯，今仗再以強陣鬥修咸頓，甫開波即搶攻，拉舒福特初段有黃金機會，但被聖人門將巴斯奴精彩救出。34分鐘出現轉捩點，卡斯米路瞓地剷波鞋底去盡，雖然剷到波在先，但動作的確礙眼，球證睇完VAR後紅牌趕佢出場。呢位巴西中場核心，繼早前對水晶宮後再次被逐，需要停賽4場。
戰至44分鐘，修咸頓中堅碧拿歷克，禁區內手球觸球，但球證冇判罰12碼，引起曼聯球員不滿。碧拿歷克當時手部雖已縮後，但肯定掂到波。
下半場只有4分鐘，雲比沙卡白界線解圍必入波，54分鐘禾特普斯直射自由球中楣，曼聯兩度大難不死之後，亦有般奴費南迪斯射中柱。71分鐘，聖人守將彼得斯禁區右路抽射又中柱，曼聯再次逃過一劫，總算保住1分。除卡斯米路領紅外，加拿祖後備入替，完場前疑似受傷，有可能需要休戰一段時間。
修咸頓攞到1分，仍然包艇，但佢哋今季曾主場賽和阿仙奴，更雙殺車路士，聯賽盃更爆大冷贏曼城，今仗又作客摸和曼聯，但上輪足總盃卻以1:2不敵乙組仔甘士比，堅係遇強愈強、遇弱愈弱。
