車路士、利物浦爭人爭上癮，鬥氣鬥到炒貴晒啲球員，白禮頓、修咸頓成最大得益者，尤其係修咸頓，真係笑到見牙唔見眼。
車路士周日雖然同未利物浦打和，但就喺轉會巿場上全面壓制紅軍。身價不斷炒高之後，車路士最終以破英超紀錄嘅1.15億鎊轉會費，另加二次轉會分成，從白禮頓手上搶走厄瓜多爾中場摩西斯卡些度。據報合約為期8年，仲有一年續約條款。
事實上，原先利物浦想買另一名中場，修咸頓嘅19歲超新星羅美奧拉維亞，但無啦啦喺上周三出手搶卡些度，仲同白禮頓火速達成1.1億鎊轉會費協議，正當領隊高普以為大局已定，點知卡些度跣利記一鑊，話明自己只係想上「車」。
原本車路士上周出價8000萬鎊，但白禮頓企硬要價1憶鎊，令雙方陷入拉鋸，依家雖然買得心頭好，但就比原先1億嘅叫價，使多咗1500萬鎊，就係咁辣著癲佬保利，須知道佢仲要係超有錢嘅癲佬…
去到19歲嘅拉維亞戰場，利物浦早前出5000萬鎊，車路士因為卡些度事件躁咗，出價同利物浦鬥Bid，據指車路士出夠5500萬鎊，然後傳出利物浦出價6000萬鎊，車路士亦照跟，等球員選擇，最終Romano報導，拉維亞已抵達倫敦，Here We Go。
其實無論結果如何，大贏家肯定係修咸頓，另邊廂白禮頓買入厄瓜多爾國腳卡些度時，亦只係用咗450萬鎊，依轉手賺咗咁多，真係要多謝利物浦同車路士喇。
