周六英超早場，狼隊補時入兩球，包括97分鐘絕殺，主場2:1反勝熱刺，令後者未能超越曼城重上榜首。
今場焦點係南韓打吡，熱刺孫興民、狼隊黃喜燦，同屬今季英超最弗前鋒。但今次對陣，唔單止全無火花，老孫直情神隱，冇射門出現，黃喜燦亦只有一次，而且係近門錯失黃金機會。
熱刺上仗打少兩個，然後繼續貫徹高位逼搶，最終大敗畀車路士，仲有進攻靈魂占士麥迪臣受傷，預計要明年初先可以復出。冇咗呢位最佳拍檔，孫興民威脅力明顯大減。
其實熱刺有個好開始，開波唔夠3分鐘，即由前鋒班倫莊遜近門撞射破網。狼隊之後全面反攻，特別下半場，藉熱刺主力傷兵多，戰鬥力下滑，有唔少危險攻門，如果唔係黃喜燦55分鐘近門無人看管下射失，早早已經扳平。
熱刺季初幾次尾段絕殺對手，但今仗本利歸環，先係90分鐘畀沙拉比亞靚波扳平，到97分鐘更慘遭慘殺，勒美拿為狼隊射成2:1完場。踏入10月之後，狼隊有2勝2和1負，相當唔錯。
賽後熱刺領隊普斯迪哥路話：「嚟呢度踢波真係好艱難，狼隊表現強橫，我哋喺比賽尾段已經筋疲力盡，係可以理解嘅，但係輸埋場波真係好難令人接受。」
