南韓足球全面升呢！繼李剛仁落實轉投巴黎聖日耳門後，中堅金玟哉加盟曼聯亦已落實，只待7月1日官宣；唔止大國腳，小將姜盛鎮亦盛傳落戶熱刺，嚟緊南韓足球勢力，大有全面爆發之勢。
尋晚轉會大神Romano報導，李剛仁已落實由西甲馬略卡加盟巴黎聖日耳門，轉會費盛傳為2200萬歐元，李剛仁係中前場多功能球員，舊年世界盃亦都有為國家隊披甲。
至於拿玻里嘅奪冠功臣金玟哉，同曼聯亦已好事近，多間英國及意大利主要媒體指，紅魔鬼今次豪掟5,000萬鎊轉會費，另年薪900萬鎊，去羅致呢位26歲南韓國腳，只待7月1日意甲夏季轉會窗重啟後，金玟哉就會正式簽約，成為史上最高身價嘅亞洲球員。
除咗曼聯，其實金玟哉亦獲巴黎聖日耳門、紐卡素等垂青，拿玻里更曾提出續約，不過紅魔鬼誠意搭夠，更保證其必然主力位置，皆因曼聯中堅位係球隊極大弱點，隊長麥佳亞唔使講，華拉尼又成日受傷，有時仲要左閘勞基梳爾客串，曼聯簽入今季意甲最佳防守球員金玟哉之後，絕對有望鞏固防線。
事實上，金玟哉喺2019年加盟中超北京國安後，其出色表現已傳勻整個歐洲，《TeamTALK》報導，其實孫興民早就已向熱刺推薦金玟哉，時任主帥摩連奴睇完片同數據後亦贊成，轉會費只須500萬歐元，可惜遭利維否決，如今金玟哉今時唔同往日，協助拿玻里封王意甲，利維真係呻笨。
瀨過一次嘢，利維終於學精咗，熱刺新帥普斯迪高路，一向極欣賞日本同南韓球員嘅拼勁，佢日前強力向球會推薦南韓U20翼鋒姜盛鎮，利維今次終於開綠燈，如果成事，有新孫興民之稱嘅姜盛鎮同正貨孫興民一齊披甲，夠晒噱頭。
姜盛鎮效力FC首爾，3季上陣57場入3球，早前代表南韓U20出戰世青盃，取得殿軍，實力早獲肯定，佢去到熱刺落班後，又有大哥孫興民做照應，實在值得期待。
