'

【英超】半場輸4粒!曼聯崩潰畀賓福特大炒 信心盡失兼包艇 坦哈格可以捱幾耐?

已經唔係恥辱咁簡單!曼聯徹底崩潰,攻守完全唔掂,作客面對賓福特,半場竟然失4球,最終亦以0:4大敗。新帥坦哈格開季兩連敗,無論球員同球迷,對佢已出現嚴重信心危機,下仗又要對利物浦,紅魔鬼點算好?

開鑼主場輸畀白禮頓,曼聯同新帥坦哈格被插到開花,今場當然要大執,C朗上仗做後備,攻力弱到痹,焗住出番佢打正選,配辛祖同拉舒福特。另一重災區係中場,兩個防中費特、麥湯文尼形同虛設,唔少曼迷都頂佢兩個唔順,結果麥湯米尼被飛起,只出費特,用艾歷臣、般奴兩個大佬鎮住中場,增加控球同創造力。

艾歷臣倒戈……慘敗。

變陣掂唔掂?上仗半場輸兩球,今次仲堅,輸夠4球!頭兩球迪基亞都要負責任,開波10分鐘,C朗回防被搶走腳下球,賓福特前鋒祖舒亞達舒華禁區邊起腳,冇力冇角度,但迪基亞發波瘟,竟然畀個波喺手邊漏入。

輸完第一粒,更加震騰騰,18分鐘,迪基亞開龍門球,選擇交畀禁區邊位置最惡劣嘅艾歷臣,結畀被馬菲亞斯贊臣迫甩,射成2:0。艾歷臣上季効力賓福特,今次倒戈相向,即遇恥辱大敗,認真慘情。

侷住全軍谷上反攻,又益晒賓福特反攻,30分鐘輸高波、混戰中被轟入,35分鐘被人反擊,一傳一射簡單搞掂。半場完,英超歷史性時刻,曼聯落後賓福特0:4。

敗局已定,華拉尼、泰利爾馬拉西亞、麥湯文尼,入替利辛度馬天尼斯、勞基梳爾同費特,加上賓福特減低逼搶力度,令曼聯冇再失波,但攻勢亦欠鋭利,冇辦法破蛋,最終輸0:4。

一場差過一場,下一場仲要對利物浦,曼聯好有機會三連敗,仲有幾多時間留畀坦哈格?今仗半場休息時,曼聯球迷大叫:你哋唔配著曼聯波衫!格拉沙家族必需離開!見心愛球隊低處未算低,曼迷的確心痛。

曼聯開季兩連敗,同時睇住兩支死敵兩連勝。曼城主場4:0大炒般尼茅夫,唔駛艾寧夏蘭特入波,因為兩個頂級中場玩晒,奇雲迪布尼、根度簡各入一球,亦造就菲爾科頓建功,加埋對手擺烏龍,湊成4蛋大捷。

迪布尼依舊堅揪。
想入波,Call我吖。

阿仙奴依然對辦,主場4:2贏李斯特城,加比爾捷西斯攻入兩粒加兩個助攻、光芒四射,格列沙加、加比爾馬天尼利都有波入。