利物浦開季成績欠理想，後防線表現下滑，右閘阿歷山大阿諾特更成為眾矢之的。前法國中堅拿保夫作出點評，指佢防守能力只屬「英冠」級別。
阿諾特係利物浦必然正選，助攻能力絕對係頂班，右路傳中落點靚到暈，仲有疊瓦式走位，喺紅軍進攻體系嘅作用非常重要；但作為右閘，阿諾防守意識差，經常掛住助攻走甩對手，喺VVD同其他拍檔狀態不足，幫唔到佢包位後，呢個弱點更加被無限放大。
上屆歐聯決賽，正係佢防守不力，畀皇馬前鋒雲尼斯奧斯射入奠勝球；今季季初，紅軍整體大跌Watt，阿諾經常畀人過咗之後，剩係睇波唔追波，更加被鬧到飛起。
拿保夫係車路士一代名將，英超頂級後衛之一，佢指阿諾只係畀利物浦獨有嘅踢法隱藏缺點，但其實佢嘅防守力只等同英冠球員。
「阿諾特攻擊能力超卓，但防守只有英冠級數。佢呢種踢法，只能生存於高普體系，當球隊整體運作唔順暢，佢防守弱點就會全面暴露。」當然，拿保夫唔係齋插，佢都有畀建議：「阿諾特只得23歲，仲有改善同進步空間，如果佢肯的話，我想教佢一啲基本防守技巧，例如多啲擰轉頭望自己後方，防守力肯定提升。」
事實上，阿諾得到高普重用，但唔係個個鍾意佢，英格蘭國家隊領隊修夫基，就極少用佢打正選，上屆歐國盃決賽周，直情冇選入最後大軍，上星期修夫基亦話世界盃如果用4人防線，首選右閘會係紐卡素嘅捷比亞。老實，阿諾狀態咁差，再次錯過國際性大賽，一啲都唔出奇。
