完場笛響起，加比爾馬加希斯跪地指向天，完成自我救贖，助阿仙奴2:1險勝富咸，開季4戰全勝，繼續壓住曼城排榜首。
周六較早開波賽事，曼城克服落後兩球劣勢，發揮強大攻擊力，由貝拿度施華扳平，艾寧夏蘭特連中三元，主場4:2反勝水晶宮，跟住就係等待阿仙奴失分，搶奪榜首席位。
相比前3仗，阿仙奴今場贏得辛苦好多，富咸整體發揮唔錯，中後場緊逼令對手進攻未如之前流暢，門將利奴倒戈大打爭氣波，前鋒則有阿歷山大米祖域繼續掛帥，反擊亦有威脅力。
上半場節奏較慢，未有入球。下半場19分鐘，加比爾馬加希斯控波輪輪盡盡，畀阿歷山大米祖迫甩後，單刀射成1:0。
落後一球，阿仙奴打得反而更放，主帥阿迪達亦果斷變陣，換入尼基迪亞踢雙箭頭，加上加比爾馬天尼利、布卡約沙卡左右兩翼連環進擊，開始攻散富咸防線，隊長馬田奧迪加特連續兩場有波入，64分鐘同布卡約沙卡配合，突入中路射門，省中對手入網，追成平手。
戰至85分鐘，阿仙奴角球造成門前混戰，加比爾馬加希斯射成2:1，將功補過，為球隊全取3分。
英超唯一4戰全勝之師，阿仙奴展現近季少見嘅強勢，12分居榜首，之後曼城、白禮頓10分。周四凌晨快車，阿仙奴主場對維拉，繼續贏波嘅機會樂觀，跟住周日作客復甦嘅曼聯，到時又有好戲睇。
