加普都識入波，唔駛做「007」，利物浦終於得到2023年第一場英超勝仗，周二凌晨默西塞德郡打吡，主場2:0擊敗愛華頓。
有邊個諗到，賽前利物浦會淪落到第10位，踏入2023年已經個幾月，打咗7場波，只係足總盃贏過狼隊，聯賽差到只得1和3負，竟然一場都未贏過。
成績低劣，傷兵多係其中一個主因。今仗後備名單，出現番大佬雲迪積克，養傷近2個月嘅法明奴同埋養咗傷4個月嘅迪亞高祖達，更加喺下半場上陣，加埋路爾斯戴亞斯亦接近復出，咁多好消息，難怪領隊高普賽後咁興奮，出番佢招牌「連環拳」慶祝動作。
今場雖然贏波，但未入波前，利物浦其實陷於苦戰，愛華頓上仗以戴治代替林柏特，發揮新帥效應，爆大冷擊敗阿仙奴，簡單而硬淨踢法，相當有效。面對宿敵紅軍，鬥志更加高昂，戰至35分鐘，更有中堅達高斯基頭槌攻門中柱。
利物浦真正大難不死，對手中完柱立即打反擊，達雲紐尼斯雖然未搵番射門鞋，但位置感同速度的確一流，左路放甩晒再傳中，沙拿乘碧福特唔知做咩前，及時趕到出腳，射成1:0。
愛華頓門將碧福特輸呢球波，畀講波嘅加利尼維爾同加歷查笑到面黃，因為佢出迎時2揀1，走咗去封冇掂波嘅加普，結果畀沙拿輕易射入空門，判斷係有問題。碧福特3年前，撞到雲迪積克幾乎收山，成為利物浦球迷仇人，今仗左閘羅拔臣仍咬到實，同碧福特發生衝突，更大笑羞辱呢位英格蘭國腳。
利物浦打支強心針，表現醒番好多，特別係荷蘭前鋒加普，活躍同投入度，明顯比之前提升，換邊後4分鐘，更接應阿歷山大阿諾特右路傳中，近門射成2:0，取得加盟紅軍後第一個入波。
去年12月28號，加普以3700萬鎊，由燕豪芬轉投利物浦，由於世界盃表現突出，仲以為呢位荷蘭國腳，會成為紅軍救星，但之前6場賽事，入波助攻乜都冇，畀人買錯水貨感覺。依家打破悶局，唔駛做「007」，睇吓嚟緊會唔會有更好表現。
傷兵陸續復出，利物浦下周中歐聯16強首回合對皇家馬德里，依然有價講；爭前4其實亦未絕望，目前落後第4位紐卡素9分，但少踢1場，仍有機會後發先至。
