2000/01球季，老牌球會高雲地利宣佈降班，一對摩洛哥星級孖寶夏積、捷普何去何從，成為當時熱爆話題。當季陪同佢哋降班嘅，係今日挑戰三冠嘅曼城、以及巴拉福特。
時隔22年，高雲地利有機會再戰英超。今晨英冠附加賽4強次回合，高雲地利憑希馬一箭定江山，兩回合計以1比0淘汰卡域克領軍嘅米杜士堡，殺入附加賽決賽。
高雲地利嘅決賽對手係盧頓，5月27日喺溫布萊一決高下。兩間都係老牌球會，同樣超過100年歷史，不過高雲地利就再耐啲，至今已140年。
今場衝超之戰，關係到一個英超入場券，呢張入場券，保守估計值兩億英鎊，大約19.5億港紙。對起緊球場嘅盧頓、曾經陷入財困嘅高地嚟講，絕對係關乎球會命運嘅關鍵戰。
高雲地利係英超創始球隊之一，去到2001年降班，當年雖未至於星光熠熠，但都有前鋒比拿美、門將卻克蘭、一對摩洛哥孖寶中場夏積、捷普等等。
降班後嘅高地隨即星散，得番捷普支撐大局，之後高地財困，捷普轉戰卡塔爾聯賽，而高地一直苦苦掙扎，去到2011/12球季降至英甲，2016/17更淪落至英乙聯賽…
以為從此一沉不起，高地救星終於出現，佢就係前曼聯球員馬克羅賓斯（Mark Robins）。其實羅賓斯都曾經教過高地1季，但喺2013年轉投哈特斯菲爾德。
2017年，羅賓斯重新掌舵之後，高地隨即於2018年重返英甲，2020上埋英冠，直至今季取得第5名、繼而殺入決賽，衝超只差一步，無論最終成功與否，羅賓斯已經係高雲地利球迷心目中嘅超級英雄。
