以為有起色，咪又係一＿樣，低處未算低呀！周六英超第4輪，車路士再次不知所謂，全場21次射門，控球率接近7成半，但結果是主場0:1不敵諾定咸森林。
普捷天奴上場後不停買入賣出，夏季轉會窗關閉前從曼城買入高爾彭馬，結果踢咗4輪，成績為1勝1和2負，與上屆相比，唔見得有好大起色。
上仗打敗盧頓開齋，以為車路士會乘勝追擊，但面對森林嚴密防線，根本一籌莫展。肥普將安素費南迪斯推前一格，同史達寧合作支援中鋒尼古拉斯積遜，至於億鎊中場卡些度正選，同干拿加歷查合作踢防中。
安素唔太適應攻擊中場位置，同一對防中摩西斯卡些度、干拿加歷查自己塞死自己，一對翼衞芝維爾、馬路古斯圖，往往只能單打獨鬥，無法製造威脅。
全場75%控球率又如何，對手森林只靠48分鐘一次突擊，便由前曼聯前鋒安東尼艾蘭加射入全場唯一入球。
車仔攻勢組織單調呆滯，巔峰時期一共有史達寧、梅迪歷、馬杜基、彭馬4大翼鋒同時在陣，最黃金機會出現於83分鐘，最有威脅依然係史達寧，右路個人突破底線傳中，尼古拉斯積遜離門幾碼，竟然一射冲天，咁大舊叉燒都唔識食，註定車路士主場全失3分。
輸一場波唔係世界末日，但目前車路士由頭到腳太多嘢要執，肥普會唔會力有不逮？進入國際賽期，英超9月16日重開，車仔屆時作客般尼茅夫，如果再輸……會唔會又步前人後塵？
