曼聯近排真係黑氣纏身，輸完波爆出將帥不和風波之後，今日又有麻煩嘢，翼鋒安東尼涉虐打前女友案有新證據出現，巴西、英國警方已展開調查，巴西足總亦發聲明，宣佈踢安東尼出國家隊大軍名單。
曼聯喺轉會窗死線日，將曾經被控告虐打及強姦女友嘅格連活特，外借到西甲基達菲，期間曼聯墊付大部份人工，仲請埋翻譯、幫佢租埋大屋，其實球會係好錫佢，可惜受制於女足及贊助商聲音，逼不得已將佢借走，希望等件事再凋淡啲，先再收番嚟用。
好唔容易幫綠木搵到下家，又輪到安東尼被控虐打前女友Gabriela Cavallin一案有新發展，事主向巴西、英國警方提出新證據，安東尼呢鋪真係一身蟻。
Gabriela係一位巴西模特兒，佢喺今年6月報案，控告安東尼傷害他人身體及恐嚇等4項罪名。Gabriela指2022年6月到本年5月，包括佢懷孕期間，遭安東尼粗暴虐打。
之後安東尼發聲明指Gabriela講大話：「我之前唔出聲係因為廢事影響調查，但我同我嘅屋企人，就因為沉默而受苦……呢啲不實指控，令我被大眾審判，我相信調查會還我清白。」
不過到咗尋日，Gabriela公開新證據，包括有whatsapp對話同相片，當中有張相係Gabriela受傷情況，包括頭部流血同手部傷口，有一張則係兩者對話，安東尼講：「我同你玩完架喇，我想你死呀！」
事實上，安東尼有一位青梅竹馬嘅女友Rosilene Silva，Rosilene跟住佢搬去荷蘭、再到曼市，二人囝囝今年已經5歲。
隨住新證據出現，原本有徵召安東尼出戰世界盃外圍賽嘅巴西國家隊，亦即時宣佈踢走佢，補選啱啱傷癒嘅阿仙奴前鋒加比爾捷西斯頂上。巴西足總發聲明指：「為保護疑似受害人、球員、國家隊及足總，我哋決定將安東尼由國家隊除名。」
