【英超】利記4:1炒車仔;紐老師4次中楣柱 成英超史上黑仔王 表現仍獲激讚

今晨英超快車,利物浦大勝車路士4:1,繼續佔據榜首。中鋒達雲紐尼斯腳風仍然唔順,佢更創下壯舉,成為英超有紀錄以來,第一個單場4次中柱或中楣嘅球員!不過呢位「地獄黑仔王」嘅表現,依然贏盡讚賞。

利物浦主場出擊,三叉戟為祖達、迪亞斯拍住達雲紐尼斯,車路士射手尼高拉積遜返唔切嚟,由高爾彭馬、史達寧、馬度亞基組成無鋒攻擊線。

紐尼斯早段已有2次機會,當中包括一次起腳,被柏度域撲到再中楣。23分鐘,巴特利(Conor Bradley)助攻畀祖達,利物浦打破缺口。39分鐘,又係巴特利,呢位20歲新人王表演,射入生涯首個英超入球。上半場補時,祖達博到12碼,點知紐尼斯射中柱,搞到紅軍半場只領先兩球。

下半場65分鐘,再次係巴特利,佢傳中畀蘇保斯拿爾頂入,利物浦贏夠3球,車仔喺71分鐘由安高古追番粒,之後迪亞斯錦上添花,利物浦大炒車路士4:1,為領隊高普帶嚟第200場英超勝仗,並以22戰51分續居榜首。

紐尼斯成為英超自2003/04年球季有紀錄以來,首位球員單場4次中柱或中楣,當中包括主射12碼中柱,佢亦係自2011年蘇亞雷斯以來,首位紅軍球員單場11次埋門食白果。

不過,呢位烏拉圭射手努力鑽營,助攻畀隊友建功而贏盡讚賞。「佢射失12碼係失望嘅,但佢真係好難應付,只是爭少少運氣,踢得好好。」領隊高普賽後激讚紐老師。而多位做即場評述嘅名宿,同樣對佢讚不絕口,當中包括舒利亞:「我好鍾意佢嘅毅力,畀心機,始終都會取得入球嘅!」

至於力追利物浦嘅曼城,則以3:1擊敗般尼,21戰46分排第2,阿仙奴22戰46分排第3位。同晚,熱刺就以3:2反勝賓福特,力壓早一日輸波嘅維拉,升番上第4。