《無間道》20周年重映緊，唔通利物浦都識擺條針去對手嗰度？周六凌晨英超，李斯特城中堅法斯，上半場尾段連擺兩個烏龍，幫助利物浦反勝2:1，2022年最後一戰，紅軍真係超好運！
晏菲路賽前有簡單儀式，除悼念球王比利，仲有上月逝世、70年代紅軍著名中鋒大衛莊臣。剛簽約加盟嘅荷蘭前鋒加普，亦首度入場觀戰。
李斯特城上仗主場吞紐卡素3蛋，未有影響信心，開波4分鐘已有好開始。利物浦防線重覆錯誤，早段又一如以往闔眼瞓，畀李城一個攻勢劏開防線，賀爾單刀射成1:0。
李城原本發揮幾好，領先後繼續穩守突擊，令利物浦冇啖好食，但完半場之前，7分鐘內竟然連輸兩個烏龍波，仲要係同一個人，真係慘過死。
38分鐘，利物浦右路地波傳中，毫無威脅，門將禾特準備輕鬆迎接，但比利時中堅法斯無端端落地剷波，但又剷到撻晒Q，皮球完美地以拋物線笠死禾特。
45分鐘，達雲紐尼斯單刀射門，笠過禾特中柱彈出，法斯想大腳解圍，但又抽入自己龍門，烏龍梅開二度，仲要半場完成，精彩！
法斯係繼利物浦加歷查（1999年對曼聯)，新特蘭Michael Proctor(2003年對查爾頓)、史篤城禾達斯（Jonathan Walters、2013年對車路士）之後，第4位喺英超單場比賽擺兩個烏龍嘅球員。
利物浦有運到爆，但計演出認真麻麻。換邊之後，藉李城搶攻，有唔少增添紀錄機會，但紐尼斯、沙拿先後敗家，錯失起碼3個黃金機會，高普場邊睇到火都嚟，唔怪之得要拿拿臨買加普。
利物浦僥倖贏波，16戰28分排第6位，但如果唔改善表現，下周二凌晨作客賓福特會好惡踢，事關賓仔聯賽重開後狀態好弗，繼打和熱刺後，作客又以2:0挫韋斯咸，以23分排第9位。
