任你點買人，都係贏唔到，一樣踢到悶死人。車路士周六凌晨出大量新兵，包括兩位天價球員梅迪歷同安素費南迪斯，可惜主場對富咸仍然冇啖好食，只能打和0比0，隊波嘅表現好似仲有排執咁，但唔少人都心生疑問：「其實係咪應該執咗個領隊先」呢？
車路士冬季轉會窗瘋狂燒錢，總共用咗5.83億歐元（約50億港元）買人，其中今仗有3位新將打正選，包括破身價紀錄嘅安素費南迪斯（1.2億歐元）、烏克蘭快馬梅迪歷（1億歐元）、法國中堅巴迪亞舒尼（3800萬歐元）。
樸達排出4231陣式，夏維斯打正前鋒，梅迪歷、美臣蒙特、薛耶治後上支援。薛耶治原本係外借到巴黎聖日耳門，但轉會窗關閉前24小時內，車路士行政部門掛住搞安素費南迪斯交易，竟然3度傳錯文件，到咗死線都未搞掂，令薛耶治出借交易告吹，令聖日耳門嬲到爆。
雖然班費差天共地，但富咸賽前排到第6位，認真叻仔，比車仔更高3位；打落防守夠快夠硬淨，前面有韋利安、阿歷山大米祖域帶動下，比對手更具威脅及效率，爬到咁前總有原因。
相比富咸，車仔推進太慢，迂迴又上腳，經常被對手截斷攻勢，能有幾次有威脅埋門，純粹靠個人質素，新球員多未夾熟當然有影響，但唔應該去到咁混亂，全無隊型。
新球員中，上仗大獲好評嘅梅迪歷，上半場掂波次數甚少，換邊後即被換走，由另一新兵馬杜基入替，呢位英格蘭年青球員，打足下半場同樣表現麻麻；反而20歲前鋒、上季為挪超莫迪狂入波嘅科芬拿，入場後曾搏得單刀機會，但最後被對手救空門。
法國年輕中堅巴迪亞舒尼擔任正選，惹人好感，破壞對手唔少攻勢；安素費南迪斯孭住天價，爭頂、攔截同分波有頗高質素發揮，但整體仍嫌綁手綁腳，要符合外界極高嘅期待，必需要突破。
如果今輪利物浦、阿士東維拉同時贏波，車仔甚至會跌出前十名，以今場表現睇，要靠下周末作客韋斯咸止跌，實在欠缺把握。
