【英超】冇彭馬唔識踢波!車路士作客吞5蛋 創造兩個羞家紀錄;阿仙奴水銀瀉地 力爭全勝

阿仙奴又過一關,贏得近14場聯賽第12勝。佢哋周三凌晨英超快車,主場5:0大炒車路士,暫時續於榜首領放。車仔頹到你唔信,今場慘敗後,即時刷新兩個球會羞家紀錄。

贏波之後,阿仙奴34戰77分,利物浦打少場74分,打少兩場嘅曼城73分。嚟緊周日,阿仙奴繼續踢倫敦打吡戰、作客熱刺,剩番仲有對般尼茅夫、曼聯同愛華頓。

據統計,今場係車路士對阿仙奴嘅正式比賽中,歷來最大敗仗,超越1930年11月史丹福橋球場輸1:5嘅比數。另外,今場亦係車仔自1986年3月以0:6輸畀昆士柏以來,喺倫敦打吡遭遇最慘痛嘅敗仗。

阿仙奴今場攻勢水銀瀉地。

車路士上仗英足盃雖然0:1不敵曼城,但其實表現幾好,如果唔係因為中鋒積遜超級敗家,可能早已殺入決賽。今場之所以潰敗,其一係王牌高爾彭馬因病缺陣,令攻力大幅下跌。其二係後防大輪換,用基卓斯、阿素迪沙斯、巴迪亞舒尼、古古列拿組成防線,完全頂唔住對手攻勢,如果唔係龍門柏高域幾次重要撲救,隨時唔止輸5粒。

至於阿仙奴今場用湯馬斯、迪勤懷斯、奧迪加特組成中場,倒戈嘅夏維斯踢中鋒,拍托沙同薩卡攻堅。上半場4分鐘,托沙窄角度抽入,先拔頭籌;車仔起初仲有啲還擊力,積遜有球波曾經中柱,但換邊後兵敗如山倒,52分鐘,賓韋特補中得手,拉開紀錄。車路士越踢越頹,攻守散晒,倒戈嘅夏維斯唔客氣,52及65分鐘入波。後衛賓韋特亦大把時間助攻,70分鐘乖巧逗入、梅開二度,阿仙奴最終贏5:0。