干地帶領嘅熱刺，深明「公關是王道」嘅道理，佢哋今次訪問孫仔祖國南韓，公關真係做足100分，無論賽前活動、記招、比賽，全部都令南韓球迷冧到爆，睇怕經過今次亞洲之旅，熱刺粉絲數量又會激增嘞！
好，到埗喇，孫仔變身導遊、舉晒牌去接機，成班粉絲已經笑到見牙唔見眼，幾咁貼地親民。達雲臣山齊士、羅美路同拜恩基爾又換晒韓服去北村韓屋村，感受同學習韓國文化，流露出尊重他國文化嘅情操。
賽前，熱刺招待球迷入場睇公開操練，干地竟然玩地獄特訓，操到卡尼堅嘔，其餘球員全部攤晒喺地下，完全冇畀面班球星，令干地嘅魔鬼教頭形象極度鮮明，吖，點知呢位嚴肅佬，喺記招上面學孫仔嘅慶祝動作，仲扮韓星派心心，嚟個反高潮，仲唔冧到你暈？
到尋晚對韓職明星隊，熱刺中後場犯錯都幾多，不過冇所謂啦，前面入番夠咪得囉，上半場用矚目新兵李察利臣，兩軍只係踢成1:1，到下半場換入孫仔同卡尼，全場掌聲雷動，呢對孖寶好識做，加埋入4粒，最終以6比3擊敗韓職明星隊。
嘩，有9粒入波，主隊都入到3粒，唔失禮，而備受寵愛嘅孫興民同好拍檔卡尼，每人都轟兩球，對南韓粉絲嚟講，呢個都應該係最圓滿結局喇。
嚟緊星期六，熱刺會繼續坐鎮「南韓主場」，喺水原迎戰西維爾，到時如果足智彩開盤，真係值得留意吓喇。
