【英超】兩度領先 仍被殘陣熱刺迫和!坦克怒轟VAR;加利佬:曼聯完全冇風格

雖然有孫興民等多名主力缺陣,仲要兩度落後,但熱刺周一凌晨英超仍能保持隊形,作客以2:2迫和曼聯,令紅魔近6仗只有1勝。

賽後曼聯專家加利尼維利狠批曼聯:「依家呢隊波完全冇風格、冇戰術,我上次見到有隊形嘅曼聯,已經係尹戈爾年代嘅事。再係咁落去,坦哈格會好危險。」

至於領隊坦哈格,賽後就怒轟VAR:「加拿祖被攬低冇12碼?我已經習慣啦,成季都係咁,首循環作客熱刺又係一樣,羅美路手球又唔吹,我仲可以數好多例子!我諗球季到某個階段,VAR會對我好啲啩,希望係咁啦。」

孫興民去咗踢亞洲盃,比蘇馬轉戰非洲國家盃,加埋占士麥迪臣仲未傷愈,陣容受損,所以熱刺急急借用RB萊比錫前鋒迪姆華拿,呢位德國球員曾効力車路士,重返英超立即正選上陣。

開波僅3分鐘,曼聯中鋒海倫藉門前混戰,搵到位勁射掛網,取得今季第2個聯賽士哥。熱刺李察利臣、迪姆華拿、班倫莊遜初度組合鋒線,默契唔錯,19分鐘,李察利臣就接應角球頂入扳平,呢球亦係巴西前鋒10月底復出後,11場聯賽第7個入球。

曾大受抨擊嘅海倫,除先開紀錄,40分鐘亦助攻畀拉舒福特射成2:1。但曼聯唔開心得幾耐,下半場開波只有1分鐘,即被賓坦古亞近門抽入成2:2。曼聯補時有絕殺機會,麥湯米尼近門無人看管下,頭槌高出,最終同熱刺打和2:2,近6仗只得1勝,仍以32分排第7。

榜首方面,阿士東維拉作客0:0和愛華頓,同曼城同得43分,少利物浦2分。阿仙奴、熱刺40分緊隨其後。