【英超】兩大神帥英超最後之舞!高普點解係哥迪奧拿宿敵?周日晚決戰前 大數據清楚晒

周日英超利物浦主場惡鬥曼城,雙方目前於聯賽榜只有1分之差,暫時分列第二、三位,今仗除咗係爭標關鍵一戰外,更加別具意義,將名留英超史冊。

作為英超史上其中兩位最成功領隊,高普同哥迪奧拿極可能最後一次喺英超交手。2015年10月入主利物浦嘅高普,同一年後接曼城帥印嘅哥迪奧拿,過去8年鬥得難分難解,隨住高普1月尾宣佈季尾結束9年紅軍歲月,今仗或成兩人英超舞台最後一次相遇。如果兩軍於之後足總盃冇機會碰頭,今仗更有可能係兩位惺惺相惜嘅宿敵,喺足球生涯共演最後舞曲。

高普和哥迪奧拿歷來於所有比賽29次交手,英超賽場15次遇上,往績十分接近。加上其他數據亦顯示,兩人是真真正正宿敵。

過去所有比賽29次交手,高普贏12次,哥帥11勝,另外6次賽和;英超賽場15次相遇,高普贏4次,哥帥錄5勝,仲有6次不分高下,同樣是鬥得難分難解。

英超史上單季最高分頭4位,都由2人包辦。哥迪奧拿帶領曼城於2017至18球季錄得100分,是歷來英超單季最高分;高普率利物浦於2019至20球季獲得99分封王,是史上第2高分。2018至19球季,98分奪冠嘅曼城係史上第3高分,利物浦97分屈居亞軍係歷來第4高分。

過去6屆英超冠軍,有5屆屬於曼城嘅哥迪奧拿,另一屆就是高普同利物浦取得,紅軍同期仲取得2次亞軍和1次季軍,兩大名帥壟斷英超。

當高普和哥迪奧拿未到英超之前,從未有一個球季出現兩支球隊都超過90分,但佢兩個過去5季就2次出現呢種情況,最令人永遠難忘一次,當然係2018至19球季,曼城以98分封王,利物浦就以97分取得亞軍,成為英超歷來最高分第2名。2021至22球季,兩軍再次鬥到最後,曼城以93分奪冠,利物浦就92分屈居亞軍,令後者未能完成單季4冠任務。

哥迪奧拿帶領曼城於英超出戰293次,取得216勝、39和、38負,合共錄得687分,是同期取得最多英超積分嘅領隊;至於高普入主利物浦以來,323出戰英超取得204勝、74和、45負,總共有686分,比哥迪奧拿僅僅少1分,係第2高分領隊。

以上數據表明,高普、哥迪奧拿成績有幾輝煌,對英超有幾壟斷,不論今晚結果如何,都無損兩帥神級地位,只希望佢哋可以合跳一場經典嘅最後探戈。