3連勝，曙光漸露。車路士周六作客3比1擊敗李斯特城，烏克蘭天價翼鋒梅迪克終於直接參與入波，送出助攻，唔駛做007！
上周英超先贏列斯聯，到周中歐聯淘汰多蒙特一戰，更加係近期代表作。三中堅陣式，安素費南迪斯、高華錫雙中場，夏維斯、祖奧菲歷斯前鋒線核心，最佳骨幹終於成形。
烏克蘭國腳梅迪克身價一億歐元，加盟後表現極差，上陣6次完全0貢獻，近期更貶為後備，冇出場機會，被譏為水貨。今仗梅迪克因史達寧受傷而復任正選，表現明顯有改善，配合夏維斯、祖奧菲歷斯，車路士攻勢相當凌厲。
祖奧菲歷斯真係堅黑仔，上半場曾射中柱同食詐胡，幸車路士仍由芝維爾先拔頭籌。芝維爾係李城舊將，佢今場倒戈前東家被狂噓，當芝維爾入波後即跑去場邊慶祝，叫李城Fans噓大聲啲。菲歷斯入唔到波不特止，39分鐘仲喺後場扭失波，被達卡遠射為李城扳平。
阿根廷中場安素費南迪斯，比梅迪克更貴，轉會費1.21億歐元，呢位阿根廷世盃冠軍成員，已成藍戰士中場核心，補時6分鐘靚傳入禁區，夏維斯之前曾食詐胡，今次冇失拖近門逗入，車路士上半場領先2比1。
下半場李城侷攻，防線露出更多空間，梅迪克曾單刀破網，但又越位在先，仍未斬獲英超第一球。78分鐘，佢以頭槌回傳中路，高華錫後上爆射成3比1，烏克蘭快翼終打破悶局，數字上取得零的突破。
車路士唔止搵番贏波感覺，攻力更全面改善，佢哋上一次單場比賽入3球或以上，已經係上年10月嘅事，而上一次作客入3球，更加要數到去舊年5月，非常遙遠。
