【英超】兩個亞洲盃失意人 孫興慜返英超即送關鍵助攻 絕殺三球王白禮頓!普帥:世界級

大年初一英超,兩個亞洲盃失意球星碰頭,孫興慜始終可靠,後備上陣交出靚助攻,2:1絕殺有三笘薰做正選嘅白禮頓,升上第4位。

白禮頓16分鐘已先開紀錄,哥斯主射12碼入網。熱刺努力反撲,但李察利臣做敗家仔,多次錯失良機,半場落後0:1。

熱刺易邊後狂攻,61分鐘柏沙亞執雞追成1:1。補時4分鐘,後備孫仔交出美妙傳中,賓倫莊遜射入,熱刺絕殺白禮頓2:1,24戰47分升上第4位,白禮頓34分排第8。

孫興慜失落亞洲盃,當然極之失望,今仗先列後備,但上陣後成為贏波關鍵,熱刺領隊普斯迪哥高奧大讚特讚:「我哋有一位世界級球員,孫興慜令最困難嘅一球,睇起嚟好容易咁就助攻畀賓倫莊遜。」

榜首形勢方面,利物浦收拾輸畀阿仙奴嘅心情,三叉戟迪亞哥祖達、達雲紐尼斯、戴亞斯各入一球,主場3:1勇挫般尼,24戰54分居榜首。

至於曼城則靠艾寧夏蘭特入波,包辦兩個士哥,主場2:0贏愛華頓,聯賽6連勝,23戰52分排第2。阿仙奴23戰49分排第3,今晚作客韋斯咸。