多蒙特中場比寧咸，可以話係英格蘭目前最矚目嘅新星，最近佢喺歐國聯表現突出，三獅兵團咁低沉，佢係極少數得到好評嘅球員，嚟緊世界盃踢正選嘅機會都頗樂觀。
但呢位未來巨星，喺三獅傳奇同偶像謝拉特面前，都只係一位小球迷。比寧咸對神奇隊長曾公開讚賞佢，感到極度興奮，仲珍而重之咁將相關影片save喺電話，並反覆睇咗好多次。
19歲新生代比寧咸，喺2020年夏天由伯明翰轉投多蒙特後，一直被視為球壇新人王。上季各項賽事上陣44場，交出6個入球14次助攻，仲有場均1.6次攔截同1.3次搶番控球權，攻守全能。
比寧咸亦好自然咁，成為各大豪門爭搶嘅對象，尤其利物浦，更視比寧咸為未來計劃嘅重點收購目標。呢單交易，紅軍有個有利因素，因為比寧咸第一偶像，係利物浦傳奇、現任維拉主帥謝拉特。
比寧咸受訪嗰陣話：「呢段謝拉特激勵我嘅片係朋友send畀我，我睇完之後覺得不可思議，有啲超現實。我立即將條片Save低、而且係睇咗幾次，然後強逼自己要冷靜。當一名英格蘭傳奇球員咁樣鼓勵你，就已經證明咗你自己。」
由於利物浦季初表現麻麻，中場線創造力不足更係致命傷之一，據報利物浦會加速收購行動，希望喺冬季轉會窗成功買人，下半季得到比寧咸效力。
同樣係紅軍隊長，同樣係全能中場，佐敦軒達臣都大讚比寧咸，指自己要更加努力，同呢位後輩爭國家隊正選席位。
睇完比寧咸最近兩場歐國聯嘅表現，神軒表示：「我唔想畀佢太大壓力，但無可否認，比寧咸已經係一位頂級球員，而我自己，就會好似以前一樣，努力爭取國家隊位置，冇乜嘢會比世界盃重要。」
