【英超】全部後衛識入波!熱刺3:1挫森林 同維拉平頭 臨尾進入地獄賽程

英超除冠軍之爭三雄鼎立,第4名亦咬到好緊,熱刺周一凌晨憑3個後衛入波,主場3:1擊敗森林,追到維拉同分。

關乎下季歐聯最後一張入場券,當然是兵家必爭之地,曼聯表現忽龍忽蟲、連環自爆,基本上已經自動棄權。剩番兩隊,維拉今輪3:3和賓福特,所以被熱刺追到平頭60分,熱刺少踢1場。

不過睇番餘下7場賽程,熱刺要對榜首3雄阿仙奴、利物浦同曼城,另外亦要對紐卡素、車路士,相當惡啃。可以話,熱刺喺今季最後直路,唔單止爭第4,對冠軍之爭亦起關鍵影響,名副其實係造王者。

熱刺今場藉對手後衛梅里路擺烏龍,15分鐘先開紀錄,森林由基斯活特27分鐘扳平。以全場射門計,森林其實比熱刺更多,基斯活特本應梅開二度,35分鐘佢離門兩碼執死雞狂抽,以為實食冇黐牙,點知竟然中柱。熱刺大難不死,下半場靠兩位後衞雲迪尹、柏度樸路破網,助主隊贏3:1完場。

熱刺名宿列納,喺賽後大讚雲迪尹:「阿仙奴球迷個個都讚沙列巴,冇錯佢係一位好出色嘅後衛,但我認為雲迪尹同樣出色,當佢受傷缺陣,你哋就見到熱刺冇咗佢嘅區別。我認為如果佢無傷,就會係另一個雲迪積克。」