【英超】全場得3次中框 曼城悶和阿仙奴 入波紀錄斷纜;周中再鬥維拉 哥帥認定「佢哋」奪標大熱

周日英超大戰,曼城主場只能同阿仙奴悶和0:0。兩軍同得1分後兩敗俱傷,並造就同日2:1反勝白禮頓嘅利物浦升上榜首,分別領先阿仙奴2分和曼城3分。賽後,曼城領隊哥迪奧拿認為利物浦係冠軍大熱,而曼城只係第3熱門。

呢場前列大戰,雙方近乎夫添,以為會好刺激,點知雙方都係逼搶專家,中前場呈膠著狀態,同早前曼城對利物浦、足總盃曼聯對利物浦嗰種好睇,完全係兩回事,全場得3次中框攻門咁大把。

作客嘅阿仙奴喺7分鐘先有具威脅攻門,加比爾捷西斯禁區內起腳擦柱出界。之後曼城角球,艾簡治門前頭槌被接實;換邊後曼城中場高華錫放冷箭貼柱出界,完場前7分鐘,最黃金餐士,法迪奧接應角球二傳,夏蘭特門前竟然踢空氣……最終兩軍悶和0:0。

最新形勢,利物浦29戰67分升上榜首,阿仙奴65分,曼城64分。今個周中英超開快車,利物浦主場對錫菲聯,阿仙奴主場對盧頓,照計冇乜阻滯,反而曼城主場對維拉,過關難度相對較高。

曼城領隊哥迪奧拿賽後話:「利物浦係大熱,阿仙奴次熱,曼城只係第3熱門,因為我哋失去咗主動權……我好想贏,但亦會接受打和嘅結果,今場係一場好艱苦嘅比賽。」

對於零封曼城,阿仙奴領隊阿迪達就好滿意:「曼城係非常難對付嘅對手,我認為我哋喺對抗方面做得好好,防守出色,對於保持到清白之身,我覺得好自豪。」事實上,今場阿仙奴令曼城連續56場主場有入波嘅紀錄斷纜,係882日以來,第一支作客曼城能夠保持清白身嘅球隊。