因為一個有3重疑點入球，阿仙奴周日凌晨作客0:1負紐卡素，今季不敗身遭打破，領隊阿迪達直指球證判決係一個恥辱。
紐卡素嘅入波可謂極具爭議，VAR用咗一段好長時間去覆核入球，因為呢個波早喺入球前疑似出界、之後疑似犯規、同埋有機會越位，結果3大疑點嘅利益都歸於主隊，最後判入球有效，阿仙奴領隊阿迪達賽後當然全面炮轟球證。
與上場聯賽盃相比，今場阿仙奴一眾主將踢番正選，尼基迪亞中鋒，兩翼薩卡、馬天尼利，迪勤懷斯繼續喺中場指揮；至於紐卡素同樣精銳盡出，三叉戟卡林威爾遜、哥頓、阿米朗。
今場雙方直接威脅埋門少，埋牙鏡頭就多，上半場紐卡素甚至冇中目標攻門，而阿仙奴就得一個，期間中場夏維斯曾危險飛鏟，僥倖逃過紅牌；紐卡素中場般奴古馬雷斯就開踭兼踢人，球證冇表示。
64分鐘，紐卡素領隊用倒戈嘅韋洛克、疑似未好番晒嘅積及梅菲入替威爾遜、阿米朗，將哥頓推前，調動立即有效果，韋洛克撈番個波傳中，祖寧頓疑似推開加比爾同拉也二傳，哥頓喺有越位之嫌撞入，VAR判入球有效，紐卡素領先1:0。
呢個入波有3重疑點，不過VAR經過審查後，判定波冇出街，祖寧頓冇推人，越位畫面則因為所有攝影機角度都被球員遮住，睇唔到出腳時間而未能畫線，疑點利益歸於被告x3下，最終判入球有效。
阿迪達賽後嬲到爆：「入波成立？難以置信！球證容許呢個波成立，絕對係恥辱！作客紐卡素已經夠難踢，因為佢哋係支好出色嘅球隊，而呢種執法水平，根本配唔上世界最佳聯賽英超，之後裁判組織點講唔關我事，因為一切已經太遲。」
同晚曼城有「扭波王」謝利美杜古大爆發，貢獻1入球、4助攻，主場6:1大炒般尼茅夫，11戰27分鐘升榜首；熱刺周二凌晨對車路士，10戰26排第2；阿仙奴11戰24分，利物浦10戰23分，列3、4位。
