人已買齊，車路士依然未能打破悶局，作客被韋斯咸逼和1比1。連續3場和波，近8次作客未贏過，車仔目前狀況，億金難求一勝。
車路士瘋狂買完人，上仗主場對富咸，連安素費南迪斯都出埋，但依然贏唔到，領隊樸達壓力巨大，需要一場有説服力嘅勝仗，挽回車仔擁躉及老闆信心，樸達今仗擺出4231陣式，夏維斯單箭頭後面，出齊坐完波監嘅祖奧菲臘斯，仲有梅迪歷、馬杜基3位攻擊好手；雙中場係安素費南迪斯、羅夫度斯卓克。
祖奧菲臘斯借將之身，首仗係1月12日作客富咸，表現相當突出，但下半場中段被逐，車仔最終亦輸1比2；波監期滿復出，呢位葡萄牙攻擊球員上半場最搶鏡，食完詐胡後，16分鐘接應安素費南迪斯妙傳，近門射成1比0。
阿根廷天價年輕中場安素費南迪斯，上周處子戰對富咸，表現都唔錯；今仗上半場更大有改善，做到中場指揮官工作，除助攻開紀錄，亦曾靚傳夏維斯單刀入波，可惜僅告越位。
韋斯咸初段防守較為鬆散，畀對手搶到主動權，失波後谷番上前壓迫，同車仔打番均勢波，開始有入肉攻勢，倒戈嘅艾馬臣柏美尼28分鐘近門射成1比1。
艾馬臣柏美尼2018-22効力車路士，曾經係正選左閘，杜曹上任後被冷落，上季被借去里昂，今季正式轉會韋斯咸，倒戈相向打爭氣波，除做足防守工作，更助攻入波。
雖然擺主攻陣，但一旦韋斯咸收緊防線，車路士就欠缺板斧，好難有入波機會，特別係梅迪歷、馬杜基左右兩邊，踢得非常沉寂，未能拉開韋斯咸防線，相當令人失望，到下半場中段亦雙雙被換出，由美臣蒙特、薛耶治兩名舊將入替。
車仔下半場尾段越踢越曳，反而韋斯咸更有威脅，84分鐘蘇錫克執死雞入波，但迪勤懷斯僅僅越位在先，研究好耐後終被VAR推翻入球。車路士後備中場干拿加歷查，89分鐘禁區邊射門，蘇錫克臥地攔截嗰陣，手部明顯有觸球，但球證冇吹12碼。
雙方最終打和1比1，自世界盃決賽周後，車路士打咗9場聯賽，仍然只得兩場勝仗。人腳齊晒，但樸達仍然未搵到理想進攻模式。下周三凌晨將有更大考驗，歐聯16強首回合作客多蒙特，睇吓轉戰歐洲賽事，車仔會唔會得到突破啦！
以今場睇，安素費南迪斯、祖奧菲臘斯將會係致勝關鍵，兩人合作入波固然高水準，級數亦明顯比隊友高，打救樸達，睇嚟只能靠佢兩個。
