【英超】倒輸畀韋斯咸1:2 熱刺創恥辱紀錄!孫仔自責致歉 普帥:個信念揸得唔夠緊!

倒輸之王!周五凌晨英超快車,熱刺主場出擊,喺半場領先嘅情況下,最終以1:2倒輸番畀韋斯咸,連續5場聯賽先入波,但冇一場贏到尾,創造咗英超史上獨有嘅紀錄!

一個月之前,熱刺曾經喺榜首領先次席5分;一個月之後,連埋今場,經歷近5戰1和4負,依家15戰得27分排第5,落後榜首阿仙奴足足9分。最諷刺嘅係呢5場不勝,熱刺都係先開紀錄嘅一方。

羅美路為熱刺先開紀錄,可惜都要倒輸。

Opta數據顯示,熱刺成為英超史上第一隊波連續5場先開紀錄,但最後全部贏唔到嘅球隊。以今季嚟計,熱刺喺領先情況下失咗16分,係歐洲五大聯賽中失分最多嘅球隊。

熱刺隊長孫興民賽後受訪,將輸波責任攬上身:「又係咁輸法,絕對不能接受!對手係難搞,但我哋一早都知領先1:0係唔夠,應該繼續進攻並贏波,但係我哋冇,攻擊球員包括我係要負上責任,因為我哋冇把握機會置對方於死地…我知球迷非常傷心同失望……」

熱刺領隊普斯迪高路,賽後亦鬧班球員,個信念揸得唔夠緊:「我哋踢緊華麗足球?我唔覺囉,我見到佢哋完全冇信念,唔單止係華麗足球,就連爭勝嘅信念都冇!不過依家難過已經係冇意義,唯一可以做嘅,就係下場踢好啲。」

普帥賽後堅燥。

熱刺今場有中堅羅美路停賽3場後刑滿復出,佢喺開賽11分鐘,就接應角球頂成1:0。之後熱刺圍攻不果,去到下半場,韋斯咸搶返唔少優勢,喺52分鐘由查洛保雲扳平。74分鐘,左閘烏度治回傳乏力造成混亂,禾特包斯第一射先中柱,之後再補射建功,韋斯咸最終憑呢個入波反勝熱刺,續居第9,距離第5位嘅熱刺只有3分之差。