車路士同曼城合力炮製4:4過山車式入球騷，成為英超近年嘅經典戰役，當中高爾彭馬倒戈入波、寸嘴但唔慶祝、搞搞震等舉動，更令佢成為呢場經典戰役嘅主角之一。
彭馬今季由曼城轉投車路士，表現勁搶鏡，而且中前場多個位置都踢得，瞬即成為球隊主力，今季射入4個聯賽入球，雖然全部來自12碼，但命中率達到100%，令佢贏得「Cool Palmer」嘅外號。
事實上，彭馬早喺上季已經喺曼城上位，但都只係邊緣人，為咗爭取正選機會、出席歐國盃，於是毅然上車。唔單止咁，日前彭馬更承認，佢其實自少已經係曼聯球迷，偶像係朗尼，傷盡曼城球迷心！
前曼城後衛安奴夏（Onuoha），喺曼車戰賽前同BBC講：「我嗰時已經覺得彭馬係天才橫溢，但見佢喺曼城嗰陣好似懶懶閒咁，唔係好搏老命咁去爭上位、求正選，後尾我知點解了，因為佢係一位曼聯球迷！」
事後彭馬亦承認，佢細個嘅偶像係曼聯傳奇朗尼：「勁出色嘅球員！我成長過程中，經常會睇好多足球比賽，令我印象深刻嘅就係朗尼，佢係我心目中嘅足球英雄。」
朗尼喺2004年加盟曼聯，當時彭馬只得2歲。至於朗尼喺曼聯生涯一共射入253球，代表英格蘭就取得53個入球，日前彭馬以替補身份首度入選英格蘭大國腳，極有機會向效法偶像之路，踏出第一大步。
