「彈出又彈入，打我吖笨！」樸達帶白禮頓帶到有聲有色，用有限資源令白禮頓好睇又好食，令唔少二線頭嘅中前場球員，都願意跟佢搵食，希望藉此發揮潛力，蘇格蘭國腳基摩就係其中一位。
21歲嘅基摩司職中場，係車路士青訓產品，舊年都有份為蘇格蘭出戰歐國盃，上年則外借到諾域治，表現唔曳，今年車路士收歸己用，以為上位在望，但去到轉會窗就快閂之際，時任白禮頓領隊樸達，就表達其「欣賞之情」，極力游說佢過檔，卒之基摩「落搭」，喺9月1日落實以1040萬歐元轉投白禮頓。
基摩轉會後受訪，亦坦承加盟白禮頓，關鍵原因係樸達：「樸達帶領下，白禮頓嘅戰術體系真係好吸引，呢個係我由車路士來投嘅主因。」而當時樸達亦好受落:「基摩踢過英超、歐聯同歐國盃，係少數有豐富經驗嘅年輕球員，佢一定幫到手。」
轉會後3日，亦即9月4日，基摩即獲地標戰機會，喺白禮頓大勝李斯特城5:2一役中後備上陣，只可惜4日後，領隊樸達就落實轉教車路士，因為仰慕樸達、由車仔轉投白禮頓嘅基摩，只能夠嘆句師徒緣淺喇。
白禮頓CEO Barber話，佢唔擔心基摩會覺得尷尬，並相信基摩好快會適應全新嘅白禮頓。由於英女皇駕崩，英超上周比賽取消，而嚟緊周末白禮頓原定會迎戰水晶宮，亦因鐵路罷工問題而延期，之後就到國際賽，換句話講，白禮頓要去到10月1號先有比賽（作客利物浦），呢個月基摩大可慢慢沉澱吓、適應吓。
