雖然形勢稍為佔優，但依然贏唔到。車路士周日作客0:0悶和般尼茅夫，開季1勝2和2負，5戰只得5分，更大鑊係只入得5球！
楣柱各中1次，仲食埋詐胡，的確欠多少運氣，但車路士入球能力弱確係不爭事實。今季前4輪，14次入球良機、於對手禁區內177次觸球，全英超第2多，但最後只攻入5球，更大問題係射門轉化率只有7.5%，排名低至第16，入波良機轉化率亦只有21%，喺全英超排尾3，領隊普捷天奴如果搵唔到解決辦法，除咗有排失分、甚至隨時飯碗不保。
睇番戰情，車路士一開波即有安素費蘭迪斯地波遠射，被今仗表現出色嘅般茅門將尼圖沒收。車路士初段控球一度高達72%，13分鐘有尼高拉積遜禁區頂拉弓射中柱。
般茅上半場初段亦有黃金機會，烏奧達拿接應隊友右路傳中近射，車路士門將羅拔山齊士救出。22分鐘，史達寧小禁區抽射省中萊特基利彈出，雙方半場打成0:0平手。
下半場初段，梅迪歷喺禁區頂搏到罰球，史達寧主射中楣角彈出，咁都未算黑仔，之後高維近門補中，可惜越位在先，車路士錯失黃金機會。57分鐘，輪到車路士後防出現混亂，泰亞高施華解圍，個波彈中基士堤柱邊出界。
之後尼高拉積遜左路傳中引起混戰，尼圖多番化解危機。尾段雙方都有埋門，比寧地波交畀蘇蘭基射門，可惜被羅拔山齊士救出，之後高爾彭馬門前撞射，又過唔到尼圖，最終雙方打和，英超今季首次出現0:0賽果。
車路士嚟緊唔使踢歐洲賽，可以養精蓄銳，下仗回師主場迎戰阿士東維拉。
