賓福特主場已成為Big 6墳墓，最新葬身社區球場嘅強隊係利物浦。賓福特以出色表現贏3:1，亦係球會自1938年11月後，首次擊敗紅軍，相當有紀念價值。
今季踢咗9次主場聯賽，賓福特只係輸過畀阿仙奴，其餘4勝4和，當中除最新贏利物浦外，季初曾大炒曼聯4:0，亦和過車路士同熱刺，以佢哋人腳嚟衡量，實在超晒額完成，抵讚到極。
其實賓福特今仗陣容唔完整，有王牌中鋒艾雲東尼因傷缺陣，但攻力冇受影響，令勝利更加珍貴；比起利物浦一班高薪球星，賓仔球員醒神得多，後衛波到人到，組織攻勢又直接，做到快、狠、準，令對手陷入苦戰。
利物浦上仗都踢得唔好，全靠對手中堅法斯擺兩個烏龍，先可以2:1反勝李斯特城，真係好彩到極點，但運氣呢樣嘢，唔會場場跟住你，今仗即刻現形。
因傷兵關係，前線繼續沙拿拍達雲紐尼斯，對住紐尼斯，球迷依家都唔會有好大期望，只求敗少啲家；前面唔掂之餘，後衛亦繼續發夢，19分鐘先有伊巴希馬干拿迪擺烏龍，42分鐘又畀尤尼韋沙頭槌破網，如果唔係兩個入波越位在先，賓福特上半場點止領先2:0。
換邊後利物浦先至瞓醒，達雲紐尼斯好辛苦入到波，又被判越位在先，卒之係由阿歷士張伯倫，喺50分鐘接應阿歷山大阿諾特，頭槌頂成較接近紀錄。
之後利物浦繼續主攻，但前鋒把握能力差，未能扳平之餘，84分鐘更輸多個突擊，麥比奧莫單刀入波前，有侵犯伊巴希馬干拿迪之嫌，但球證判入球有效，賓福特贏3:1，主場再一次搞掂Big 6球隊。
世界盃後，利物浦表現一場差過一場，目前17戰28分排第6位，比第4位曼聯少4分。佢哋下仗係周日凌晨英足盃對狼隊，跟手14號（周六晚）英超作客白禮頓，新加盟嘅荷蘭加普會辦好轉會手續，可以及鋒而試，睇吓會為紅軍帶嚟幾大刺激。
